قصة حجابك #حجابى_عزتى

قصة حجابك

#حجابى_عزتى

 لما تنتشر أفكار فى بلادنا غريبة و تلاقى  بعض الناس بتأيدها و دوافعهم أغرب و حججهم أعجب ! فتحسى 

كدة بمسئولية غريبة...

 تقولى لأ انا لازم اعمل حاجة ... لازم على الأقل اقول رأيى و احاول افهم وجهة النظر المخالفة دى ايه و يفكروا لية كدة وايه الدوافع اللى تخليهم يعملو كدة !! فتتصدمى بكلام ملوش أساس يعنى كلام و مبررات عايزة تبرير يعنى محدش بيجاوب إجابة مقنعة ... باختصار اللى بتكلم فيه هو موضوع خلع الحجاب بحجة انه (ليس فرض أو فرضيته مشكوك فيها ) أو بحجة انه (قيد للحريات) ... الموضوع ده شاغلنى كتيييير أوى ومش عارفة لحد دلوقتى اعمل ايه او دورى أيه و ايه اللى اعمله و  احس بالرضا عن نفسى فيه ..انا مش هتكلم كتير عن فرضية الحجاب لأنه موضوع مفروغ منه  خلاص فمتسمعيش بالله عليكى لأى كلام نابع من أهواء شخصية لمجموعة من الناس ومبررات فاشلة ( أينعم فاشلة جدا ) وكلام كله بصراحة ملوش أى 

لازمة .

فالحجاب نعمة من الله سبحانه و تعالى فهو فريضة وليس بعادة او ببدعة .

نقطة انه (قيد) بقى دى اللى نفسى أقول فيها الكلمتين الجايين دول ...كتير من البنات لو فهمو بس المعنى الحقيقى للحجاب واللى مش بس مختصر فى (الطرحة) هى اه الجزء الظاهرى بس لو فعلا فهمو المعنى الحقيقى للحجاب هيقدرو و ببساطة يتغلبو على كل سبب (وهمى دنيوى) يقدرو يتغلبو على كل (هاجس) بيخليهم يضعفو و ممكن لقدر الله ياخدو القرار بخلع الحجاب.

الحجاب عمره ما كان قيد لحريتك ؟ مين قال كدة ؟ مين قال ان الحجاب عائق انك تحققى حلمك او انك توصلى للنفسك فيه ؟ أصلا أيه الربط ده ؟! حجابى عائق انى أكون مذيعة فى بلدى مثلا ؟ الف مثال لمذيعات محجبات ناجحات جدا و معروفين..حجابى عائق انى اكمل دراستى برة مثلا ؟ ألف مثال لبنات ومنهم اصدقائى سافرو لبلاد اوروبية وكانو معتزين بحجابهم جدا  و كانو بالعكس حجابهم برة كان دافع ليهم للإلتزام اكتر واكتر مش بس ظاهرياً لأ فى سلوكهم اليومى .. حجابهم خلاهم حاسين بجمال المسئولية انا مسلمة محجبة بمثل حجابى فى بلد غير بلدى .. بلد ممكن يكون فيها نسبة اضطهاد للمسلمين بسيبب الميديا و خلافه .. ليه مقلعوش الحجاب بقة ؟!! الفكرة انك فكرى شوية قبل ماتحكمى و تظلمى حجابك انه عائق او شىء والله أبدا عمره ماكان عائق لحلم .

طبعا الموضوع ده لسة برده عليه مبادرات و كلام كتير زى ما قلت كلام كله #عبث

المهم انا حبيت اقترح على مجموعة من البنات من خلال الانستجرام اننا نشارك بعض بقصة حجابنا انطلاقاً 

من مبدأ

Small gestures can make huge impacts

والحمد لله كان فى مشاركة وبنات  كانو حابين يساعدو اى بنت انها تاخد القرار بارتداء الحجاب من خلال قصة حجابهم  ومنهم حب انه يقول السبب اللى مخليهم مش عارفين يرتدوا الحجاب بشكل أفضل...

فاطمة :

من فترة كدة واحدة صحبتى اوى يعنى دخلتنى فى جروب على الفيس بوك عن الحجاب والبنات كانوا بيكتبوا ازاى اتحجبوا وامتى ...كان فى الأول حجابى مش اختيارى على الرغم انى كنت عارفة ومتأكدة من فرضيته بس زى ما انتم عارفين كنت صغيرة شوية كنت فى اعدادى و قررت انى اتحجب .. ممكن السبب الأول اللى كان مدايقنى بحكم سنى الصغيرة انى مش بعرف الف الطرحة صح ومش بعرف اختار الألوانات المناسبة بس بعد كدة ومع التعود عرفت .. لما كبرت شوية ادركت حاجة ان حجابى لازم يمثلنى انا محجبة ومؤمنة بفرضية حجابى و مؤمنة ان حجابى مش بس طرحة لأ ده كيان .. حاولت انى اغير من شكل هدومى يعنى فى الاول الجينز كان اساسى عندى حتى ولو على بلوزات طويلة ..بس برده مكنتش بحس انى مبسوطة لحد ما قررت البس الجيبات واسيب البنطلونات نهائى .. الفكرة مش فى البنطلون برده قد ما انا وعيت انى حجابى عفتى ولازم احترمه اكتر لازم ميكونش بس طرحة وجيبة لأ اسمى من كدة بكتير بس دى خطوة حلوة وانا مبسوطة بيها ... انا دلوقتى بحمد ربنا على نعمة الحجاب والستر و مرتاحة الحمد لله وانا بحاول اكون ماشية وربنا راضى عنى .. ادعولى بالثبات والهداية وان ربنا يكتب الحجاب لكل بنت مسلمة نفسها تاخد الخطوة دى و يثبت جميع المحجبات .
#حجابى_عزتى 


: سندس

كنت فى اعدادى وقفت قدام المراية وقعدت اجرب إيشاربات ماما وكل شوية الإيشارب يتزحلق لورا او ينزل على وشى لقدام مش عارف الف الإيشارب خالص.. قلعتها وقعدت ادعى يارب اليوم اللى اتحجب فيه اعرف الف الحجاب وميبوظش منى.. وفجأة لاقيت ماما جايبالى طرحة بيضا صغيرة كدة علشان اصلى بيها بدل ما بصلى بإيشارباتها الكبيرة اللى بتتزحلق منى .... فاكرة انى اخدتها جرى على المراية ولفتها و ظبطت منى المرة دى ونزلت بيها تانى يوم المدرسة.. القرار اخدته فى فترة اعدادى وثانوى 
فترة الجامعة كان التحدى ! اتأثرت شوية لبسى بدأ ميكنش اللبس اللى يليق بالحجاب ، بس مكنتش مبسوطةكنت بحس دايما انى برضى حد بس انا مش راضية بحاول ابقى شبه حاجة مش شبهى... وقفت مع نفسى واقفة كان اساسها ان فكرة الحجاب مش مجرد طرحة عالراس هى حاجة بتبدأ من جوة ل برة مش العكس ، انا ايه ؟ وبعمل ايه ؟ وغايتى ايه ؟وبرضى مين ؟ ولما جاوبت على نفسى خدت القرار الأصعب وهو ان جوة لازم يعكس على اللى برة، واصلاح النفس كان اساسها ..الحجاب مش سهل عايز حد قوى وشجاع الموضوع مابيخلصش من اول ما بتحطى الطرحة فوق راسك لأ ده بيبدأ.. طريقة تفكيرك ..جامعتك..شغلك..اصحابك..حلمك ..دراستك قصادهم بتقابلك فتن.. كلام سلبى و تقييم مبنى على الشكل 
الفكرة انك تكونى قد التحدى وقادرة انك تحترمى حجابك وتقوى نفسك بيه مش اول ما اضعف اسيبه علشان
#حجابى_عزتى 


: أشرقت
الحاجه اللي نفسي اقولها اني عمري ما كنت فاكره اني بعشق حجابي بالشكل دا .. و اول مره حسيت بيه و بالغيره عليه الفتره الاخيره لما الناس فضلوا يهاجموا اشرف حاجه و اغلي حاجه عند اي بنت بجد حسيت اد ايه انا غيرانه عليه و من ساعه الموضوع دا و هو جه عليا بالخير و بدات اصلح من شكل حجابي عشان جمله سمعتها ان كل البنات 
لابسينه غصب او عاده اهل البلد... حسيت انو لا انا مبسوطه بيه لدرجه اني هبدا اصلح منو و فعلا بدات .

انا قصتي  من و انا تقريبا عندي 7 سنين كنت بحب شكل الحجاب علي ماما و اخواتي اوي كنت بعمل حاجه مسخره اوي كنت بلبس الحجاب ف رمضان و اقلعه بعد رمضان من و انا عندي 7 سنين و لما كان عندي 10 سنين كنت ساعات بلبسه ف المدرسه و بره المدرسه لا مش عارفه ليه بصراحه بس انا كنت هبله اوي بس انا و الله قادره افتكر احساسي و انا فرحانه و انا لبساه كنت بحس باه اني زي البنات الكبيره و كدا و بقلد ماما و اخواتي .. لحد 6 ابتداءي لما بقا خلاص فرض عليا ماما قالتلي انتي دلوقتي مكلفه تلبسيه بس ا دي طاعه لربنا و بنؤجر عليها و هيتبسط منك ربنا لما تتحجبي ..  
 لما كبرت بقا فضلت التزم فيه جدا و وصلت لمرحله مش وحشه ف التزامي للحجاب و لبسي بس طبعا ازاي الشيطان يسيبنا ف حالنا ؟ لازم يرجعنا عن اي خطوه كويسه و رجعت لبسي مش مناسب للحجاب تاني  .. لحد السنه دي لحد بالظبط ممبادرة خلع الحجاب دا حسيت بغيره مش طبيعيه علي حجابي و حسيت ان دفاعي عنو استحاله يكون بالكلام لازم من منظري اكون ابلغ رد علي اي حد يقول مش ملتزمين بيه عشان لابسينه غصب .. انا ف اخر سنه ف الجامعه و من ساعه اخر يوم بطلت البس فيه ملتزم لحاااااد اول يوم قررت اصلح تاني منو محستش الاحساس الجميل اللي حساه دلوقتي خطوه انك تفهمي ان اه الحجاب حب و طاعه لله بجد احساس لا يقارن بشيء  حجابي عباده جميله
#حجابى_عزتى

منة :

بالنسبة لى الحجاب كان امر مسلم بيه يعنى لبسته وانا فى اولى اعدادى كان عندى 12 سنة وقتها .. القرار خدته بسرعة و مرجعتش عنه ومن غير اى ضغط من اهلى ... بس برده فى الاول قبل الحجاب الامر لم يسلم من بعض التصرفات الطفولية ... لما كنت بطلع رحلة مع المدرسة زمان كنت باخد معايا هدوم انا واصحابى نلبسها مثلا بنطلون وبلوزة لان ده كان ممنوع عندنا فى المدرسة ...كمان انا اتربيت و شوفت  قرايبى واصحابى دايما لابسين محتشم فاللبس المحتشم انا اتربيت عليه .. يعنى يوم ما اتحجبت كان الموضوع سهل الحمد لله .. وفى مرحلة النضج فهمت وعرفت ان تربيتى على الاحتشام كانت صح وان اهلى كانو صح _ودى كانت التنشئة السليمة من وجهة نظرى - بالرغم من تعسفهم فى بعض الأحيان ولكن الثمين دائماً يغطى ... برأيى طبعا الحجاب فرض وطالحمد لله بحب حجابى ومع ذلك شايفة انى برده لسة  مش ملتزمة بالقدر الكافى ... شايفة انى مقصرة بحق حجابى ...اسأل الله الثبات و التوفيق وان يعيننى على عبادته وحسن طاعته وكافة نساء المسلمين .
#حجابى_عزتى


مرام :

 كنت دايماَ أقول هتحجب وبرضو مش بلبس الطرحة لحد ما جه يوم صحيت الصبح كنت مخنوقة جداً .. كنت نازلة الدرس كنت ساعتها فى ثانوى ... فتحت التليفزيون لاقيت مصطفى حسنى بالصدفة كان بيتكلم مع واحدة عن جمال الحجاب وحلاوة ستره .. حسيت انه بيكلمنى انا وفضلت اسمعه وأعيط وبس ..كان ميعاد الدرس خلاص قرب المفروض ألبس و أنزل ومرة واحدة لاقيت نفسى بفتح الدولاب ولبست الطرحة ونزلت ومن ساعتها وانا اتحجبت .... كان فيه إغراءات ليه لبستيه .. شعرك طويل وناعم ليه خبتيه ولحد دلوقتى بيتقالى الكلام ده بس الحمد لله عمره الكلام ده ما أثر فيا وكل ماحد بيقولى كدة بحس انه باخد  عشر خطوات ل قدام مش برجع ل ورا والا بضعف الحمد لله

 #حجابى_عزتى

مريم :

انا اتحجبت وانا فى تانية ثانوى وكنت فى السعودية وكان نفسى اروح واعمل عمرة وكل ما اقول لبابا وماما عاوزة اروح يقولولى ماينفعش بعدها ما تتحجبيش واستنى انتى ممكن تلبسيه ولقدر الله تقلعيه لو نزلتى الجامعة وكدة ، بس جيت فى مرة قلت طيب انا قدامى فرصة انى اعمل عمرة بسهولة وناس كتيييير قوى بتعافر علشان تقدر تعملها طيب ليه لأ ؟ ايه يضمنلى انى اعيش لحد ما انزل الجامعة فى مصر وارجع تانى ؟ طيب انا بأجلها ليه ما هو الحجاب ده حاجة حلوة واكيد ربنا مش هيفرضه غير لحكمة قلت خلاص اعمل العمرة واتحجب وفعلا الحمد لله كانت احلى حاجة عملتها فى حياتى وبعدها ربنا كرمنى ب 3 عمرات منهم اتنين فى رمضان .. وكنت كل مرة باخد خطوة فى حجابى للأحسن شكلا و مضمونا ، انا برده مش لبسى لبس حجاب صح قوى بس بحاول وهفضل احاول ان شاء الله لحد ما اوصل لحجاب سليم ميظلمش حجابى... الحمد لله ان عمرى ما فكرت اقلعه وان شاء الله عمرى ما هفكر فيها ابدا يارب.

#حجابى_عزتى

سلمى :

زى معظم البنات وانا فى اعدادى كنت متخيلة انه لسة بدرى على الحجاب .. هعيش حياتى واستمتع وبعد كدة ممكن اتحجب .. كان فى دماغى ان الاتنين متعارضين مع بعض وان لو اتحجبت وانا صغيرة هيبقى بقيد نفسى من بدرى ومش هعرف استمتع بشكلى ولا حياتى.. فى اولى ثانوى ومن غير ما افكر لقيت نفسى بقيس طرح من عند ماما وكنت لوحدى فى البيت.. كلمتها فى التليفون يومها قولتلها هاتيلى طرحة بيضا وانتى جاية علشان المدرسة بكرة.
فى المدرسة تانى يوم طول اليوم بعيط حاسة انى اخدت قرار اكبر منى ومش طايقة الطرحة ومش عارفة اعمل ايه ..سبحان الله ممكن تكون البداية مش مثالية ومش زى ماكنت متوقعة ان ربنا هيسهلها عليا بس هو كان فى الآخر اختبار.. انا بلعب والا بجد استحق المكانة دى.. وكل يوم كنت بصبر فيه كنت ببقى اقوى واحس الموضوع هين ... فى الاول مكنتش بستحمل الحربس بعد فترة مبقتش بحس بأى مشكلة كأن مفيش اى حاجى على راسى او رقبتى .. المشكلة اللى طولت معايا 7 سنين بعد الحجاب انى مكنتش بعرف البس حلو و دايما متخيلة انى لازم اضحى بشكلى عشان انا محجبة...دايما هيبقى شكلى زحمة و اكبر من سنى ... دلوقتى انا واحدة تانية بفكر تانى اشتغلت على نفسى كتير وفهمت معنى كونى محجبة من جوا وبرة وبطلت اشترى لبس مش للمحجبات و بقيت اتشقلب علشان اخليه ينفع ويليق بحجابى .. بطلت اسمع كلام ناس .. اشتغلت محررة موضة من فترة ودرست ستايلنج وبقيت ادى نصايح للبنات ازاى يلبسوا والحمد لله بحجايى عايشة اهم حلم عندى.
#حجابى_عزتى 

: شيماء

خطوة أنى اتحجبت جت بسرعة .. مرة نزلت من البيت روحت بيتنا التانى كنت نازلة بشعرى عادى وصلت البيت بصيت فى المراية كدة وقررت انى اتحجب ... ليه و إزاى و أمتى مهمنيش واتحجبت فجأة انا لبسته وانا فى أعدادى كنت فرحانه (بالتغيير) فقط ... بس لاقيت راحة نفسية فيه واستحسان من الناس اللى حوالية بس لقيت مشكلة فى موضوع الهدوم .. كنت بلبس بنطلونات وحاجات قصيرة شوية وفضلت فترة طويلة البس هدوم متلقش انى محجبة و تظلم حجابى ومن تلت سنين بالظبط بدأت احس بالذنب.. افضل ابص فى المراية و أقول مش راضية عن نفسى كدة لازم اتغير والمهم ابتديت واحدة واحدة اوسع فى هدومى و البس الطرحة بشكل اجمل و اتخليت عن البنطلونات نهائى يعنى حتى ولو ساعات بلبسها بتكون واسعة وعلى بلوزات طويلة .. كان عندى فى الأول جيبة بحبها اوى وبلبسها على طول لحد ما بقيت كل ما انزل اشترى هدوم مبصش عالبنطلونات واحب البس هدوم واسعة ..حلو اوى انك تكونى بنت محجبة و محتشمة وتأثرى فى اللى حواليكى .. الحجاب من أحلى نعم ربنا والحجاب مش بس قماش فوق الراس وخلاص بالعكس ده اكبر واسمى من كدة .. ده تاج كل بنت مسلمة .. والحمد لله انى اخدت الخطوة السريعة دى فى يوم من الأيام .. الحمد لله على نعمة الحجاب 

#حجابى_عزتى

مى :

من وانا فى ابتدائى وانا بسافر السعودية و بعمل عمرة كل سنة عشان بابا شغال هناك وعلى طول كان   بيكلمنى عن الحجاب بس انا مكنتش فاهمة ساعتها اوى لحد اعدادى قررت انه فى الاجازة وكان رمضان وقتها نويت الحجاب والحمد لله ربنا كرمنى واتحجبت فى الاول لقيت زمايلى فى المدرسة بحكم انى فى مدرسة راهبات مكنش فيه محجبات كتير كانوا بيسألونى ليه ؟ انتى لسة صغيرة ؟ والحمد لله رب العالمين انا مستمرة ومرتاحة بحجابى وان شاء الله رمضان الجاى هيكون التالت ليا بالحجاب... الحجاب حلو أوى كفاية انه بيقول للناس البنت دى مسلمة .
#حجابى_عزتى

آية :

كنت صغيرة لما لبست الحجاب وكنت فى الأول بحكم سنى شايفاه ظاهرياً فقط انه مكبرنى وسط اصحابى اللى فى سنى وده كان اللى بيدايقنى لما حد يشوفنى محجبة وانا صغيرة اوى ولبساه بس بعد فترة لما كبرت شوية حبيت حجابى واهتميت انى اقرا كتير عن الحجاب وبدأت اعالج النقطة اللى شوية مش عارفة اعالجها (شكلى) بالحجاب  كبداية و لاقيت ان بنات كتير برا محجبات وشكلهم حلو ولبسهم يليق بحجابهم وقتها عرفت ازاى احب واشجع نفسى اكتر على الحجاب جوهريا مش ظاهريا وبس وبقيت اعرف كمان ازاى ادور على هدوم تليق بأنى محجبة مش طرحة وبس ودلوقتى مبقتش اشوف نفسى حلوة غير بحجابى .. انا الحمد لله بحب حجابى وفخورة بأى بنت محجبة فاهمة حجابها صح ومش ظالمة حجابها.
#حجابى_عزتى


امثلة كتيرة جميلة وحلوة لبنات حجابهم هو كيانهم جزء أساسى من تكوينهم ليه ؟ لأنهم فهمو وعرفو المعنى الحقيقى للحجاب مش بس فى الشكل الظاهرى لأ وكمان الجوهرى اصل بالمنطق كدة الحاجة الحلوة من جوة اكيد هتكون اكمل من برة  بحجابهم وعزتهم بيه .. الحمد لله دائما وابدا على نعمة ستره ، بحجابك انتى اجمل واقوى واقيم وقدوة لغيرك فبالله عليكى متاخديش القرار اللى يظلمك و قبل ما يظلمك يظلم حجابك.

#حجابى_عزتى